Հայաստանում հայտնաբերված ամենահին եկեղեցին Արտաշատում
Հայ-գերմանական հնագիտական արշավախումբը Արտաշատում՝ Խոր Վիրապ վանքի մոտ, հայտնաբերել է Հայաստանում երբևէ գտնված ամենահին եկեղեցին։ Այն 4-րդ դարի է՝ քրիստոնեության ընդունումից ընդամենը մի քանի տասնամյակ անց։
Ութանկյուն շինությունն ունի խաչաձև կցակառույցներ, տրամագիծը մոտ 30 մետր է։ Հատակը եղել է թրծակավե սալիկներից և կրային ծեփից, գտնվել են Արևելյան Միջերկրականի մարմարի բեկորներ։ ՀՀ ԳԱԱ հնագիտության և ազգագրության ինստիտուտի տնօրեն Արսեն Բոբոխյանի խոսքով՝ «սա Հայաստանում հայտնի ամենավաղ քրիստոնեական պաշտամունքային կառույցն է»։
Վերևից արված լուսանկարում երևում են պեղված շինության հիմքերը՝ բաց գույնի պատերի ուրվագծերով։
